Иоанн Рыльский-тропарь и молитва

Преподобному и богоносному отцу нашему

Иоанну Рыльскому, чудотворцу

Тропарь, глас 1-й

Покаяния основание, прописание умиления, Образ утешения, духовнаго совершения равноангельное житие Твое бысть, преподобне. В молитвах убо, и в пощениих, и в слезах пребывавый, отче Иоанне, Моли Христа Бога о душах наших!

Кондак, глас 8-й

Ангельскому житию поревновав, преподобне, Вся земная оставив, ко Христу притекл еси И того заповедьми ограждаяся, Явился еси столп непоколебим от вражиих нападений. Тем зовем ти: Радуйся, отче Иоанне, светило пресветлое!

Молитва

Земная звездо чудесная, яже от предел Средца града возсиявшая, и свещниче живый, иже всю землю болгарскую светом правды Божия осияваяй, предивный в постницех угодниче Божий, отче Иоанне, преподобных убо радование, Церкве Болгарския украшение, веры православныя крепкое утверждение, скорый помощниче к тебе с верою и любовию притекающим и великий пред Господем о всех нас предстателю: прими, преблаженне, моления наша и умоли Христа Бога нашего, яко да вси тобою невидимо охраняеми и союзом братския любве связуеми людие словенстии в мире пребывают и благочестии, и да избавит их Господь о враг видимых и невидимых, от нашествия иноплеменник, от недуга и глада, от всякия скорби и всякаго зла! Предстоящим же зде и молящимся пред честным образом твоим испроси, преподобне, у Господа нашего Иисуса Христа вся, яже ко спасению прошения, да вси с тобою непрестанно прославляем всесвятое имя Отца и Сына и Святаго духа ныне и присно и во веки веков! Аминь!

Молитва

О великий и предивный чудотворче, преподобне Иоанне, прими моление наше и не отвратися от нас, к твоему заступлению прибегающих: никогдаже бо не отвращался еси от приходивших к тебе с печальми своими во дни земнаго твоего жития; вемы же, коликая знамения милосердия являл еси и по преставлении твоем людям православным! Услыши и нас ныне, велиими скорбьми обдержимых, нашедшими на ны в лукавыя дни сия, егда диавол через пагубныя козни свои тщится попрати Церковь святую, лишити же нас спасения вечнаго и благ временныя жизни! Испроси нам у Господа Иисуса Христа прощения грехов, а наипаче непослушания матери нашей Церкви! Даруй нам сокрушение сердца, во еже со умилением неуклонно приступати ко святому таинству покаяния, яко да не во осуждение и погибель будет нам причащение тела и крови Христовых, но во здравие и спасение! Отжени от нас дух братоненавидения, даруя нам дух любве и мира к братскому единению всех людей твоих! Соедини всех нас любовию ко Христу и его Церкви православней, яко да соблюдающе спасительную волю Его, истинная чада Божия будем! Буди нам путевождь во вся дни наша, яко да присно во благодати Духа Святаго сущее в чистоте веру содержим и волю Господню до самыя смерти сотворим! В час же кончины нашея явися нам представити души наша ко престолу божественнаго Судии и рещи Ему: «Се аз и дети моя», яко да твоим заступлением вечных мук избавльшеся, неизреченное блаженство небеснаго Царствия Христова наследим купно с тобою и всеми святыми во веки веков! Аминь!





Рейтинг@Mail.ru